ភ្នំពេញ៖ ក្រុមហ៊ុនកង់ GIANT កម្ពុជាបានប្រគល់កង់ និងសម្ភារៈកីឡាដល់សហព័ន្ធកីឡាទ្រីយ៉ាត្លុងកម្ពុជាដើម្បីសម្រួលដល់ការហ្វឹកហាត់របស់ក្រុមជម្រើសជាតិកីឡាអន្តរជាតិមួយនេះមុនការប្រកួតស៊ីហ្គេមដែលនឹងចូលមកដល់នៅប៉ុន្មានខែខាងមុខ។

ពិធីប្រគល់ធ្វើឡើងនៅគណៈកម្មាធិការកីឡាអូឡាំពិកកម្ពុជារវាងតំណាងក្រុមហ៊ុនកង់ GIANT និងប្រធានសហព័ន្ធកីឡាទ្រីយ៉ាត្លុង លោក គង់ រិទ្ធីជព្វ កាលពីថ្ងៃទី៦ ខែមីនា ឆ្នាំ២០២៣។

លោក គង់ រិទ្ធីជព្វ បានថ្លែងអំណរគុណដល់ក្រុមហ៊ុន GIANT ដែលបានផ្ដល់ជាសម្ភារៈកីឡានាថ្ងៃនេះ ដោយថាសម្ភារៈទាំងនេះពិតជាមានសារសំខាន់ក្នុងការគាំទ្រដល់ការហ្វឹករបស់ក្រុមកីឡាករជំរើសជាតិទ្រីយ៉ាងត្លុងកម្ពុជាសម្រាប់ត្រៀមក្នុងការប្រកួតស៊ីហ្គេមក្នុងពេលខាងមុខ។ លោកបានជំរុញដល់កីឡាករខិតខំ ហ្វឹកហាត់ដើម្បីដណ្ដើមបានមេដាយមាសជូនជាតិផងដែរ។

លោក គង់ រិទ្ធីជព្វ បានប្រាប់សារព័ត៌មាន EAC News ថា៖ «ខ្ញុំសូមអរគុណក្រុមហ៊ុន GIANT និងលោកប្រធាន Andy ដែលបានឧបត្ថម្ភជួយយើងតាំងពីឆ្នាំ២០០៩ មកឱ្យកីឡាករកីឡាការិនីយើងហ្វឹកហាត់រហូតមកដល់ពេលនេះមានតាំងពីកង់ មួកស្បែកជើង ព្រោះកីឡានេះត្រូវការសម្ភារៈច្រើនណាស់ដូចយើងមើលឃើញពីក្រោយនេះ»។

ជម្រើសជាតិកីឡាទ្រីយ៉ាងត្លុង កញ្ញា ថន សុម៉ាវត្តី បានប្រាប់ EAC News ថា សម្ភារៈកីឡាដែលទទួលបាននាថ្ងៃនេះគឺពិតជាបានជួយសម្រួលដល់ហ្វឹកហាត់របស់នាងបានច្រើន ដោយថាការហ្វឹកហាត់ពីមុនមានការហ្វឹកហាត់ទៅលើសម្ភារៈដែលមិនទាន់គ្រប់ស្ដង់ដារកីឡាទ្រីយ៉ាងត្លុងដែលធ្វើឱ្យមានការលំបាកក្នុងការវាស់ស្ទង់សមត្ថភាព។ តាមរយៈការទទួលបានសម្ភារៈហ្វឹកហាត់ថ្មីនេះកញ្ញា សុម៉ាវត្ដី ថានឹងខិតខំហ្វឹកហាត់បន្ថែមទៀតដើម្បីប្រកួតយកជ័យជម្នះនាពេលខាងមុខ។

កញ្ញា សុម៉ាវត្តីថា៖ «សម្រាប់រូបរាងខ្ញុំផ្ទាល់ និងពួកខ្ញុំទាំងអស់គឺខ្ញុំមានការប្រឹងឱ្យអស់ពីកាយពីចិត្តមែនទែនដើម្បីយកមេដាយជូនជាតិ»។

តំណាងក្រុមហ៊ុន GIANT កម្ពុជាដែលបានប្រគល់សម្ភារៈឧបករណ៍នាថ្ងៃនេះកញ្ញា រៀល លីហ្សា បានឱ្យដឹងថាការឧបត្ថម្ភនេះគឺក្រុមហ៊ុនមានគោលបំណងក្នុងចូលរួមជួយដល់ប្រទេសជាតិក្នុងការប្រកួតស៊ីហ្គេមនាពេលខាងមុខ និងមានក្ដីសប្បាយរីករាយបានក្លាយជាចំណែកមួយជួយដល់កីឡាករកម្ពុជា។

កញ្ញា លីហ្សា៖ «ក្រុមហ៊ុនយើងអាចជួយបានតាមលទ្ធភាពដែលយើងជួយបានព្រោះយើងជាខ្មែរដូចគ្នា និយាយទៅស៊ូៗទាំងអស់គ្នា គោលបំណងគឺឈ្នះទាំងអស់គ្នា មេដាយ ប្រទេសជាតិ យើងតែមួយទាំងអស់គ្នា»។

សម្ភារៈដែលចែកជូននាពេលនេះរួមមានកង់ មួកសុវត្ថិភាព សម្លៀកបំពាក់ និងឧបករណ៍កីឡា និងស្បែកជើងដែលមានតម្លៃប្រមាណ ៣ម៉ឺនដុល្លារអាមេរិក។

គួរឱ្យដឹងដែលថាកីឡាទ្រីយ៉ាងត្លុងគឺជាប្រភេទកីឡា៣រួមបញ្ចូលគ្នាតែមួយដែលរួមមាន ប្រណាំងកង់ ហែលទឹក និងរត់ប្រណាំង៕